Tökum góða skapið og jákvæðnina með norður

Góða kvöldið

Nú styttist heldur betur í mótið góða fyrir norðan, N1 mótið fræga.

Við erum búin að undirbúa okkur mjög vel og mikil tilhlökkun í hópnum. Strákarnir eru búnir að vera virkilega duglegir í vetur og nú á vor- og sumarmánuðum og taka miklum framförum.

Þegar farið er á mót sem þetta er mjög mikilvægt að leikmenn og foreldrar átti sig vel á því að það getur brugðið til beggja vona hvað árangur varðar. Það þarf lítið að fara úrskeiðis þannig að liðin lenda neðarlega í mótinu og margt þarf að ganga upp til að árangur verði góður. Hvort sem gerist er mjög mikilvægt að leikmenn og ekki síður foreldrar verði jákvæðir og hvetji liðin áfram alveg sama hvað. Það allra versta á svona mótum er þegar farið er að bölsóttast yfir að leikir vinnist ekki og allt verður ómögulegt. Það gerir bara illt verra og mun betra er að fara vel yfir hlutina þegar að heim kemur og allir búnir að setjast niður í ró og næði.

Góða skapið og jákvæðnin verður að koma með norður yfir heiðar og við þjálfararnir ætlum virkilega að vera jákvæðir og uppbyggilegir, hvetja liðin áfram og stýra af festu og sanngirni. Einelti og stríðni er ekki liðin með neinum hætti í ferðinni og við erum allir jafnir og eigum að vera vinir.

Sjáumst hress og kát á Akureyri á miðvikudag og munum:

ÁFRAM FRAM!!!!

Kveðja,

Dóri og Villi 

Athugasemdir

[sigrún (IP-tala skráð) 2.7.2013 kl. 12:55]

Hæ! í hvaða skóla gista drengirnir fyrir norðan? kv.Sigrún

[Sirrý (IP-tala skráð) 2.7.2013 kl. 16:47]

Þetta er úr póstinum um mótið :)

2. Það eiga allir strákar að vera mættir kl. 14:00 í Lundarskóla í stofu FRAM, miðvikudaginn 3. júlí. Fyrstu leikir hefjast 15:40 svo það er mikilvægt að enginn sé seinn.