Mætum betur á æfingar strákar!

Sælir strákar!

Eftir að sumardagskráin hófst hefur mæting á æfingar verið mun verri.

Það skrýtna við þetta að þið eruð ekki bara að mæta verr þegar þið þurfið að ferðast á milli hverfa á sameiginlegar æfingar, heldur líka að Safamýrardrengir eru að mæta verr á æfingar í Safamýri og Grafarholtsdrengir verr á æfingar í Úlfarsárdal!

Það gengur auðvitað illa upp að taka framförum í fótbolta þegar maður mætir ekki á æfingar og lítið sem þjálfarar geta gert þegar leikmenn mæta ekki og láta ekki vita af sér. Við heyrum að það sé mikið um að þið séuð uppteknir í tölvuleikjum og gleymið ykkur í þeim. Það er ekki góð þróun ef rétt er.

Við erum í efstu deild (A-riðli) í 5. flokki. Erum stöðugt að spila gegn hörkuliðum sem æfa mjög vel. Framundan er N1 mótið sem er virkilega stórt og skemmtilegt mót.

Að sjálfsögðu skorum við á ykkur strákar að taka þetta á fullu og mæta vel á æfingar. Einnig að hlusta vel á það sem verið er að kenna á æfingunum og hafa gaman af þessu.

Minnum á leikina á morgun í Safamýri og lítið vel á dagskrá vikunnar hér fyrir neðan.

Kveðja,

Þjálfarar